Asiantaeth Safonau Bwyd Cymru

Ein nod yw cael ein hystyried fel ffynhonnell fwyaf dibynadwy Cymru o gyngor a gwybodaeth am fwyd.

Ein nod yw bod yn ffynhonnell gyngor a gwybodaeth bwyd mwyaf dibynadwy Cymru. Ein cylch dylanwad yw 'o'r fferm i'r fforc' - mewn geiriau eraill, o'r pwynt lle mae'r bwyd yn cael ei dyfu neu ei weithgynhyrchu i'r adeg pan mae'n cyrraedd ar eich plât. Rydym yn eich rhoi chi, ddefnyddwyr Cymru, yn gyntaf.
Mae gan aelodau o staff ASB Cymru amrediad eang o arbenigeddau polisi a phroffesiynol. Wedi'n lleoli yng nghanol Caerdydd, rydym yn cyflawni swyddogaethau amrywiol a wnaed yn flaenorol gan staff iechyd cyhoeddus ac amaethyddiaeth Llywodraeth Cynulliad Cymru.
Ym 1999, cafodd pwerau diogelwch a safonau bwyd eu datganoli i Gynulliad Cenedlaethol Cymru. Mae'r ASB yn atebol i'r Cynulliad Cenedlaethol, ac i'r Senedd drwy'r Gweinidogion Iechyd. Mae gweithio o fewn cyd-destun datganoli yn gallu bod yn fanteisiol gan ei fod yn golygu ein bod yn gallu ystyried anghenion a materion sy'n ymwneud yn benodol â Chymru, tra'n parhau i sicrhau ymagwedd gyson, DU-gyfan tuag at ddiogelwch bwyd nad yw, wrth gwrs, yn cydnabod ffiniau gwleidyddol na daearyddol.
Bydd yr Asiantaeth yn gwarchod buddiannau defnyddwyr Cymru trwy ddilyn tri gwerth craidd. Bydd yn rhoi'r defnyddiwr yn gyntaf, bydd yn agored a hygyrch, ac yn llais annibynnol. Rydym yn cyflawni ein gwaith yn agored, ac mae'r penderfyniadau a wnawn yn agored ac eglur.
Meysydd gwaith allweddol yr Asiantaeth yng Nghymru yw:

• Maethiad - darparu cyngor i'r cyhoedd, y Cynulliad Cenedlaethol ac eraill ar faethiad a deiet, gan weithio gyda'r Cynulliad ar feysydd o gyd-gyfrifoldeb;
• Gwarchod defnyddwyr - trwy orfodaeth a monitro effeithiol, gan weithio'n agos ag Awdurdodau Lleol Cymru;
• Lleihau salwch a gludir gan fwyd - gweithio gyda diwydiant a gorfodwyr i leihau halogiad, a hyrwyddo ymwybyddiaeth gyhoeddus o drafod bwyd yn ddiogel;
• Sicrhau diogelwch bwyd - er enghraifft, trwy gyfrannu at weithgarwch y DU i sicrhau nad yw cemegolion yn peryglu diogelwch bwyd, a bod camau rheoli BSE yn cael eu gorfodi'n briodol;
• Cefnogi dewis defnyddwyr - trwy labelu cynhyrchion yn gywir ac ystyrlon a thrwy ddarparu gwybodaeth i'r cyhoedd ar faterion diogelwch bwyd, canlyniadau arolygon a gweithgarwch gorfodi.

Mae Pwyllgor Cynghori ar Fwyd Cymru yn goruchwylio ein gwaith. Sefydlwyd y Pwyllgor i ddarparu cyngor a gwybodaeth i'r Asiantaeth yng Nghymru ac fe'i cadeirir gan Ann Hemingway, sydd hefyd yn aelod Cymru o Fwrdd yr Asiantaeth Safonau Bwyd. Mae cyfarfodydd pwyllgor agored, a gynhelir bob ychydig fisoedd mewn lleoliadau ledled y wlad, yn enghraifft o ymrwymiad ASB Cymru i weithredu'n agored.

Mae gan Bwyllgor Cynghori ar Fwyd Cymru wyth aelod arall, sy’n darparu sylfaen eang o wybodaeth am faterion bwyd a materion sy’n gysylltiedig â bwyd. Gellir gweld bywgraffiadau o'r holl aelodau ar y wefan hon - cliciwch ar Pwyllgor Cynghori ar Fwyd Cymru ym mhrif ddewislen tudalen Cymru.