Helpu i lywio ein polisïau

A hoffech chi ddweud eich dweud ar sut ydym ni’n llywio ein polisiau? Dyma’ch cyfle chi! Mae’r adran hon ar gyfer defnyddwyr, busnesau bwyd, awdurdodau lleol ac unrhyw un arall sydd â diddordeb yng ngwaith yr Asiantaeth. Rydym am glywed gennych chi ar sut allai ein cynigion ni – boed yn rhai deddfwriaethol neu anneddfwriaethol – effeithio arnoch chi a’ch gwaith.

Wrth ddechrau mynd ati i ddatblygu polisïau, bydd eich adborth yn ein helpu wrth i ni negodi cynigion yn Ewrop a chyn i ni lansio unrhyw ymgynghoriad ffurfiol yn y Deyrnas Unedig.

Cael yr wybodaeth ddiweddaraf:

Drwy danysgrifio i’n rhestr bostio, byddwch yn cael e-bost i’ch hysbysu bob tro yr ydym ni’n cyhoeddi cynnig newydd neu gynnig diwygiedig yn yr adran hon.

Tanysgrifio i’n hysbysiadau e-bost ar gyfer cynigion deddfwriaethol ac anneddfwriaethol

Cynigion presennol

Ceisio safbwyntiau pawb sydd â diddordeb ar Ganllawiau'r Asiantaeth Safonau Bwyd ar Anifeiliaid Hela Gwyllt

Rydym ni'n ceisio safbwyntiau ar gynnwys (a chynllun) Canllawiau'r Asiantaeth Safonau Bwyd ar Anifeiliaid Hela Gwyllt. Rydym wedi datblygu'r canllawiau i'w defnyddio gan bawb sydd â diddordeb, gan gynnwys y rheiny sy'n saethu a/neu gyflenwi’r anifeiliaid hyn ac yn manwerthu/prosesu helgig. Gall swyddogion gorfodi cyfraith bwyd ddefnyddio'r canllawiau hefyd wrth ymgymryd â'u dyletswyddau gorfodi.

Trefniadau arfaethedig o ran cyflwyno Rheoliad (UE) Rhif. 1137/2014 ar stumogau anifeiliaid cnoi cil ifanc a thraed carnolion

Rydym yn gofyn am eich sylwadau ar y trefniadau arfaethedig ar gyfer cyflwyno Rheoliad (UE) Rhif 1137/2014 sy'n diwygio Rheoliad (CE) Rhif 853/2004 mewn perthynas ag ymdrin â stumogau anifeiliaid cnoi cil ifanc a thraed carnolion y bwriedir eu bwyta gan bobl. Rydym hefyd yn gofyn am wybodaeth am effaith bosibl y mesur.

Adolygu cyngor i ddefnyddwyr (gan gynnwys grwpiau sy'n agored i niwed) ar fwyta wyau yn eu plisgyn yn amrwd neu wedi'u coginio'n ysgafn a'u cynhyrchion yn y Deyrnas Unedig (DU)

Mae grŵp arbenigol a sefydlwyd gan y Pwyllgor Cynghori ar Ddiogelwch Microbiolegol Bwyd (ACMSF) i edrych ar ddiogelwch wyau wedi canfod bod lleihad wedi bod yn y perygl o salmonela mewn wyau yn eu plisgyn o'r DU ers ei adroddiad diwethaf ar y mater hwn 15 mlynedd yn ôl.

Ymatebion i'r cynnig i gyflwyno mesurau cymeradwyo penodol ar gyfer cynhyrchu byrgyrs nad ydynt wedi’u coginio’n drylwyr

Ym mis Mai 2016, cyhoeddodd yr ASB gyngor i weithedrwyr busnesau bwyd ac awdurdodau lleol ar weini byrgyrs nad ydynt wedi'u coginio’n drylwyr.

Cynigion blaenorol

Canllawiau arfaethedig i sefydliadau gofal iechyd a chymdeithasol: Lleihau risgiau listeriosis i grwpiau sy’n agored i niwed

Rydym wedi rhoi canllawiau newydd at ei gilydd ar gyfer sefydliadau gofal iechyd a gofal cymdeithasol i’w helpu i leihau’r risg i bobl sydd yn eu gofal ac sy’n agored i niwed gael listeriosis drwy fwyta bwyd oer sy’n barod i’w fwyta. Cyfrannodd ystod eang o randdeiliaid at y broses o ddatblygu’r canllawiau, a’u diben yw ategu arfer da yn y diwydiant bwyd.

Ymdrin ag Ymddygiad Annerbyniol – Tynnu Gwasanaethau Arolygu a Milfeddygol yn ôl

Rydym yn ceisio safbwyntiau rhanddeiliaid ar ein polisi arfaethedig yn amlinellu sut y byddwn ni, yr awdurdod cymwys, yn delio ag ymddygiad annerbyniol gan Weithredwyr Busnes Bwyd tuag at staff, ac yn arbennig tynnu gwasanaethau arolygu a milfeddygol yn ôl mewn lladd-dai cymeradwy a ffatrioedd prosesu.

Amseroedd storio ar gyfer cig wedi'i oeri y bwriedir ei friwio a pharatoadau cig - Cymru a Lloegr

Rydym yn ceisio sylwadau ar effaith bosibl cynnig diweddar y Comisiwn Ewropeaidd mewn perthynas ag amseroedd storio a ganiateir ar gyfer cig wedi'i oeri y bwriedir ei friwio ar y diwydiant cig.

Canllawiau technegol ar reolau newydd ynghylch labelu alergenau bwyd a darparu gwybodaeth amdanynt i gynorthwyo busnesau bwyd bach a chanolig eu maint

Hoffai’r Asiantaeth Safonau Bwyd (ASB) ofyn am eich barn am ganllawiau technegol drafft sydd wedi’u llunio’n bennaf ar gyfer busnesau bwyd sy’n fusnesau bach a chanolig eu maint.

Newidiadau Arfaethedig o ran Gorfodi’r Gofynion Ardystio ar gyfer Anifeiliaid sy’n cael eu Lladd ar Frys

Mae’r Asiantaeth Safonau Bwyd (ASB) yn adolygu ei gweithdrefnau gweithredol ar gyfer derbyn carcasau anifeiliaid a gaiff eu lladd ar y fferm o dan amodau lladd ar frys, lle nad yw’r dystysgrif filfeddygol ofynnol wedi’i cwblhau’n foddhaol neu lle nad yw’r gofyniad cyfreithiol i’r Milfeddyg ardystio i ddyddiad ac amser y lladd wedi’i fodloni.

Canllawiau ar brofi llaeth ar gyfer gweddillion gwrthfiotigau

Mae’r ASB wedi cyhoeddi canllawiau ar brofi llaeth ar gyfer gweddillion gwrthfiotigau yn dilyn adolygiad rheolaidd. Fel rhan o’r adolygiad, rhoddwyd sylw i’r argymhellion a wnaed yn ystod archwiliad Swyddfa Bwyd a Milfeddygaeth y Comisiwn Ewropeaidd o reolaethau swyddogol mewn perthynas â’r sector llaeth. Cafodd yr archwiliad ei gynnal ym mis Ebrill 2013.

FSA in Wales