Cynhyrchiant gwin y DU yn codi’n sylweddol yn 2025, yn ôl data newydd gan yr Asiantaeth Safonau Bwyd

Data blynyddol ynghylch cynhyrchiant gwin ^{(footnote 1)}

Mae’r ffigurau’n dangos bod 124,377 hectolitr o win — sy’n cyfateb i dros 16.5 miliwn o boteli — wedi’u cynhyrchu ledled y DU yn 2025. Mae hyn yn adlewyrchu’r amodau tyfu rhagorol a brofwyd drwy gydol y flwyddyn a thwf parhaus diwydiant gwin sy’n ffynnu ledled y DU.

Gwelwyd twf arbennig o sylweddol ar gyfer gwin gwyn, gyda’r cyfaint cynhyrchu yn cynyddu mwy na 131% o’i gymharu â’r flwyddyn flaenorol, gan danlinellu cryfder cynhaeaf 2025.

Tyfodd nifer y gwinllannoedd a gofrestrwyd gyda’r ASB hefyd, gan gyrraedd 1,158 — cynnydd o 4.3% ers y flwyddyn flaenorol — gyda mwy na 10,000 o bobl bellach yn cael eu cyflogi ar draws y sector.

Mae diwydiant gwin y DU bellach gwerth hyd at tua £14 biliwn, sy’n cadarnhau ei statws fel diwydiant sy’n cyfrannu’n sylweddol at yr economi genedlaethol.

Mae cynhaeaf 2025 wedi cael ei ddathlu’n eang gan gynhyrchwyr ledled Cymru a Lloegr. Roedd y tywydd ffafriol drwy gydol y tymor tyfu wedi arwain at ansawdd ffrwythau rhagorol a chynnyrch (‘yield’) sydd heb fod mor uchel ers blynyddoedd lawer.

Mae 2025 wedi bod yn flwyddyn hollol eithriadol ar gyfer gwin o Gymru a Lloegr, ac mae’r ffigurau hyn yn adlewyrchu pa mor bell mae’r diwydiant wedi dod. Ein rôl ni yw sicrhau bod y gwin sy’n cyrraedd defnyddwyr wedi’i labelu’n gywir a’i fod yn bodloni’r safonau gofynnol. Mae’r twf rydyn ni’n ei weld ar draws y diwydiant, o winllannoedd a warysau i gyfanwerthwyr a masnachwyr, yn gwneud ein gwaith yn bwysicach nag erioed.

Mark Dawson, Arweinydd y Tîm Arolygu Safonau Gwin yn yr Asiantaeth Safonau Bwyd

Rydyn ni’n croesawu ffigurau llawn yr ASB ynghylch cynaeafau. Maen nhw’n cadarnhau’r cynhaeaf o 16 miliwn o boteli gwnaethon ni ei nodi’r llynedd, ac mae ein hadroddiad ansoddol a meintiol manwl a lansiwyd heddiw yn rhoi’r holl fanylion. Mae ansawdd a graddfa cynhaeaf 2025 yn ein gwneud ni’n obeithiol iawn, ac rydyn ni’n cydnabod sgiliau sylweddol a gwaith caled y gwinllanwyr a gwneuthurwyr gwin, wrth iddynt sicrhau ail gynhaeaf mwyaf y DU.

Nicola Bates, Prif Weithredwr WineGB