Neidio i’r prif gynnwys

Diweddariadau i Ganllawiau Technegol yr Asiantaeth Safonau Bwyd ar labelu alergenau bwyd a gofynion gwybodaeth

Bydd Rheoliad newydd, a ddaw i rym ar 1 Hydref 2021 yn newid y ffordd y mae gofyn i fusnesau bwyd yn Lloegr ddarparu gwybodaeth am alergenau ar fwyd wedi'i becynnu ymlaen llaw i'w werthu'n uniongyrchol (PPDS). Mae diweddariadau arfaethedig i'r Canllawiau Technegol presennol ar labelu alergenau bwyd a gofynion gwybodaeth i adlewyrchu'r gofynion cyfreithiol newydd hyn. Pwrpas yr ymgynghoriad hwn yw ceisio barn a sylwadau rhanddeiliaid yng Nghymru, yn Lloegr ac yng Ngogledd Iwerddon ar y diweddariadau arfaethedig.

I bwy fydd yr ymgynghoriad hwn o ddiddordeb fwyaf?

  • Busnesau Bwyd sy'n cynnig bwyd wedi’i becynnu ymlaen llaw i'w werthu'n uniongyrchol (PPDS) (Gweler Atodiad B)
  • Cyrff sy’n cynrychioli’r diwydiant bwyd
  • Awdurdodau gorfodi
  • Unrhyw sefydliad neu berson arall sydd eisiau gwybod mwy am newidiadau sydd ar y gweill i'r gofynion cyfreithiol ar gyfer darparu gwybodaeth am alergenau ar gyfer bwyd PPDS.

Beth yw pwnc yr ymgynghoriad hwn?

Gosodwyd Rheoliadau Gwybodaeth am Fwyd (Diwygio) (Lloegr) 2019 (Offeryn Statudol 2019 Rhif 1218) gerbron y Senedd ar 5 Medi 2019. Daw'r Rheoliadau hyn i rym ar 1 Hydref 2021 a byddant yn newid y ffordd y mae gofyn i fusnesau bwyd yn Lloegr ddarparu gwybodaeth am alergenau ar fwyd wedi'i becynnu ymlaen llaw i'w werthu'n uniongyrchol (PPDS).

Mae deddfwriaeth gyfwerth ar wahân ar y gweill yng Nghymru ac yng Ngogledd Iwerddon. Pwnc yr ymgynghoriad hwn yw diweddariadau arfaethedig i Ganllawiau Technegol yr Asiantaeth Safonau Bwyd (ASB) ar labelu alergenau bwyd a gofynion gwybodaeth o dan Reoliad Gwybodaeth am Fwyd i Ddefnyddwyr yr UE Rhif 1169/2011 (“Canllawiau Technegol yr ASB”). 

Mae'r diweddariadau hyn yn bennaf i adlewyrchu'r gofynion cyfreithiol newydd hyn, ond rydym ni hefyd yn achub ar y cyfle hwn i gynnig rhai diweddariadau technegol/drafftio. Bydd y diweddariadau i'r canllawiau yn berthnasol yn Lloegr a disgwylir iddynt fod yn berthnasol yng Nghymru ac yng Ngogledd Iwerddon. Byddai'r ASB felly'n croesawu barn a sylwadau rhanddeiliaid yng Nghymru, yn Lloegr ac yng Ngogledd Iwerddon.

Beth yw diben yr ymgynghoriad hwn?

Ceisio barn a sylwadau rhanddeiliaid yng Nghymru, yn Lloegr ac yng Ngogledd Iwerddon ar ddiweddariadau arfaethedig i'r Canllawiau Technegol.

Pecyn ymgynghori

Sylwadau a barn

Anfonwch unrhyw sylwadau a safbwyntiau at:

Duncan Harris
Tîm Datblygu Rheoleiddio a Chefnogaeth Broffesiynol, y Gyfarwyddiaeth Polisi Bwyd
 
Llawr 6
Clive House,
70 Petty France,
Westminster,
Llundain, 
SW1H 9EX.
E-bost: duncan.harris@food.gov.uk
Ffôn: 020 7276 8334
 

Cyhoeddi crynodeb o'r ymatebion

Rydym ni’n gobeithio cyhoeddi crynodeb o’r ymatebion a ddaw i law o fewn tri mis i ddiwedd yr ymgynghoriad a darparu dolen i’r crynodeb o’r dudalen hon.

Yn unol ag egwyddor yr Asiantaeth o fod yn agored, byddwn yn cadw copi o'r ymgynghoriad a'r ymatebion llawn, a fydd ar gael i'r cyhoedd ar gais. Gallai’r crynodeb o'r ymatebion hefyd gynnwys data personol, fel eich enw llawn. Ni fyddwn yn datgelu unrhyw ddata personol arall oni bai y ceir cais am yr holl ymatebion i’r ymgynghoriad. Os nad ydych am i’r wybodaeth hon gael ei rhyddhau, ewch ati i lenwi a dychwelyd y Ffurflen Cyhoeddi Data Personol. Nid yw dychwelyd y ffurflen hon yn golygu y byddwn yn trin eich ymateb i'r ymgynghoriad yn gyfrinachol, dim ond eich data personol.

Rhagor o wybodaeth

Mae'r ymgynghoriad hwn wedi'i baratoi yn unol ag Egwyddorion Ymgynghori Llywodraeth EM. Os oes Asesiad Effaith wedi cael ei gynhyrchu, bydd wedi’i gynnwys yn y dogfennau ymgynghori. Os nad oes Asesiad Effaith wedi cael ei ddarparu, bydd y rheswm yn cael ei nodi yn y ddogfen ymgynghori.