Bwyd a Chi 2

Bwyd a Chi 2 yw ein harolwg blaenllaw sy’n mesur y wybodaeth, yr agweddau a’r ymddygiad a nodwyd gan bobl o ran diogelwch bwyd ac ymddygiadau eraill sy’n ymwneud â bwyd.

Gweld as PDF

Os ydych wedi cael llythyr yn eich gwahodd i gymryd rhan yn yr arolwg Bwyd a Chi 2, ewch i wefan yr arolwg www.foodandyou2.org.

Beth yw Bwyd a Chi 2?

Arolwg blaenllaw yr Asiantaeth Safonau Bwyd (ASB) yw Bwyd a Chi 2 gydag oedolion (16 oed neu hŷn) yng Nghymru, Lloegr a Gogledd Iwerddon. Mae’r arolwg yn mesur y wybodaeth, yr agweddau a’r ymddygiad a nodwyd gan bobl o ran diogelwch bwyd ac ymddygiadau eraill sy’n ymwneud â bwyd.

Cynhelir yr ymchwil bob 6 mis gan ddefnyddio dull ‘gwthio i’r we’ (push-to-web). Mae hyn yn golygu bod yr ymatebwyr, i ddechrau, yn cael llythyr yn eu gwahodd i gymryd rhan mewn arolwg ar-lein. Maent hefyd yn gallu llenwi fersiwn bapur o’r holiadur.

Bob 6 mis, cysylltir â sampl ar hap o gartrefi preifat ledled Cymru, Lloegr a Gogledd Iwerddon drwy’r post gan eu gwahodd i gymryd rhan.

Dechreuodd y cylch gasglu data gyntaf ym mis Gorffennaf 2020.

Y pynciau sy’n cael eu cynnwys yn arolwg Bwyd a Chi 2

Mae Bwyd a Chi 2 yn ymdrin â phynciau fel diogelwch bwyd yn y cartref, siopa bwyd, bwyta allan, diogeledd bwyd (food security), pryderon am fwyd, ac ymddiriedaeth yn yr ASB a’r gadwyn cyflenwi bwyd.

Gofynnir rhai cwestiynau ym mhob cylch o’r arolwg, tra bydd cwestiynau eraill yn codi’n llai aml, er enghraifft bob blwyddyn neu bob dwy flynedd.

Mae’r tabl canlynol yn rhoi rhestr o’r pynciau a drafodwyd a phryd y cyhoeddwyd canfyddiadau ar bob pwnc ddiwethaf:

Modiwl	Pynciau dan sylw	Amlder	Y data diweddaraf sydd ar gael
Amdanoch chi a’ch cartref	Dewisiadau deietegol a gorsensitifrwydd i fwyd (amlder a diagnosis) Cyfrifoldebau siopa a choginio Gwybodaeth am gartrefi a demograffeg	6 mis	Bwyd a Chi 2 – Cylch 7
Bwyd y gallwch ymddiried ynddo	Ymwybyddiaeth o’r ASB ac ymddiriedaeth ynddi Hyder o ran diogelwch a dilysrwydd bwyd Hyder yn y gadwyn cyflenwi bwyd	6 mis	Bwyd a Chi 2 – Cylch 7
Pryderon am fwyd	Pryderon am fwyd	6 mis	Bwyd a Chi 2 – Cylch 7
Diogeledd bwyd	Nifer yr achosion o ddiffyg diogeledd bwyd (modiwl diogelwch bwyd USDA) Newidiadau y mae pobl wedi’u gwneud am resymau ariannol	6 mis	Bwyd a Chi 2 – Cylch 7
Siopa am fwyd	Ymddygiadau wrth brynu bwyd Hyder mewn gwybodaeth am alergenau Ymwybyddiaeth a chamau a gymerwyd mewn ymateb i rybuddion bwyd ac alergeddau Agweddau tuag at les anifeiliaid, tarddiad ac effaith amgylcheddol bwyd	12 mis	Bwyd a Chi 2 – Cylch 7
Bwyta allan a’r Cynllun Sgorio Hylendid Bwyd (CSHB)	Agweddau ac ymddygiadau yn ymwneud â bwyta allan ac archebu bwyd o siopau tecawê Ymwybyddiaeth a defnydd o’r CSHB	12 mis	Bwyd a Chi 2 – Cylch 6
Bwyta gartref (craidd)	Gwybodaeth am ddiogelwch bwyd ac ymddygiadau yn y cartref (cwestiynau craidd)	12 mis	Bwyd a Chi 2 – Cylch 6
Bwyta gartref (golwg fanwl)	Gwybodaeth am ddiogelwch bwyd ac ymddygiadau yn y cartref	24 mis	Bwyd a Chi 2 – Cylch 6
Gorsensitifrwydd i fwyd (golwg fanwl)	Cwestiynau manwl ar orsensitifrwydd i fwyd	24 mis	Bwyd a Chi 2 – Cylch 6
Bwyta’n iach (Gogledd Iwerddon)	Bwyta’n iach gan gynnwys gwybodaeth (er enghraifft canllawiau’r llywodraeth), agweddau ac ymddygiad	24 mis	Bwyd a Chi 2 – Cylch 7
Materion sy’n dod i’r amlwg (golwg fanwl)	Deietau cynaliadwy ac ymddygiadau wrth brynu Arferion bwyta dewisiadau amgen i gig a dealltwriaeth o’r rhain	24 mis	Bwyd a Chi 2 – Cylch 4