Hylendid bwyd ar gyfer eich busnes

Mae hylendid bwyd da yn hanfodol i sicrhau bod y bwyd rydych chi'n ei weini'n ddiogel i'w fwyta. Mae'n helpu i atal gwenwyn bwyd.

Pan fyddwch chi'n sefydlu busnes bwyd, mae angen i chi gyflwyno ffyrdd o weithio a fydd yn eich helpu i sicrhau bod mesurau hylendid bwyd da ar waith o'r cychwyn cyntaf.

Y pedwar hanfod hylendid bwyd

Dyma'r pedwar hanfod ar gyfer hylendid da: 

• Glanhau
• Coginio 
• Oeri
• Croeshalogi

Gallwch chi ddefnyddio'r pedwar hanfod i atal y problemau diogelwch bwyd mwyaf cyffredin.

Storio bwyd yn ddiogel

Mae'n bwysig iawn storio bwyd yn y lle cywir i'w gadw'n ddiogel, i'w ddiogelu rhag bacteria niweidiol, cemegion a gwrthrychau yn mynd i mewn i fwyd. Bydd angen i chi storio gwahanol fathau o fwyd trwy eu cadw mewn: 

• cynwysyddion sy'n cael eu cadw mewn cypyrddau neu ar silffoedd – fel pasta, reis a blawd
• oergell
• rhewgell

Cludo bwyd yn ddiogel

Pan fyddwch chi'n cludo bwyd, o'ch safle i leoliad arall neu o'r warws talu a chario i'ch safle, rhaid i chi sicrhau eich bod chi'n atal y bwyd rhag cael ei halogi, er enghraifft gyda baw neu facteria. 

Mae'n arbennig o bwysig sicrhau bod:

• bwyd yn cael ei gludo mewn deunydd pecynnu neu gynwysyddion sy'n diogelu'r bwyd rhag halogiad 
• bwyd oer a bwyd wedi'i rewi yn cael ei gadw ar y tymheredd cywir (mae rhai busnesau'n defnyddio bagiau a blychau oer, neu faniau wedi'u hoeri) 
• bwyd amrwd a bwyd parod i'w fwyta yn cael eu cadw ar wahân

Hyfforddi staff

Yn ôl y gyfraith, mae'n rhaid i weithredwyr busnesau bwyd sicrhau bod unigolion sy'n trin bwyd yn cael yr oruchwyliaeth a'r hyfforddiant hylendid bwyd priodol, sy'n cyd-fynd â'r ardal y maent yn gweithio ynddi ac yn eu galluogi i drin bwyd yn y modd mwyaf diogel. Yn y Deyrnas Unedig, nid oes rhaid i unigolion sy'n trin bwyd gael tystysgrif hylendid bwyd i baratoi neu werthu bwyd.

Gellir dysgu'r sgiliau a addysgir mewn rhaglenni hyfforddi swyddogol hefyd drwy:

• hyfforddiant wrth weithio
• hunan-astudio
• profiad blaenorol perthnasol

Mae gennym ni gyrsiau diogelwch bwyd ar-lein rhad ac am ddim i fusnesau, gan gynnwys hyfforddiant alergenau a chyrsiau labelu bwyd. 

Hylendid personol

Er mwyn cadw bwyd yn ddiogel, mae'n hanfodol bod gennych chi a'ch staff safonau hylendid personol uchel. 

Mae hylendid personol yn cynnwys:

• golchi dwylo
• dillad
• addasrwydd i weithio
• hyfforddiant

Arolygiadau a sgôr hylendid bwyd

Bydd swyddogion awdurdodedig eich cyngor lleol yn arolygu eich safleoedd i wirio a yw eich busnes yn cydymffurfio â chyfraith bwyd ac yn cynhyrchu bwyd sy'n ddiogel i'w fwyta. 

Os ydych chi'n gweini neu'n cyflenwi bwyd yn uniongyrchol i'r cyhoedd, mae'n bosib y byddwch chi'n rhan o'r Cynllun Sgorio Hylendid Bwyd. 

Bydd eich sgôr yn seiliedig ar yr hyn a welir ar ddiwrnod yr arolygiad ac efallai y byddwch chi'n cael sgôr hylendid rhwng 5 (da iawn) a 0 (angen gwella ar frys), yn seiliedig ar y safonau hylendid bwyd ar y pryd. 

Canllawiau ar gyfer y diwydiant bwyd

I gael rhagor o wybodaeth am hylendid ar gyfer eich busnes, gallwch chi brynu a darllen ein canllawiau ar wefan y Swyddfa Llyfrfa.  

Gwneud a gwerthu brechdanau

• Canllaw'r Diwydiant Bwyd ar Arfer Hylendid Da: Siopau Brechdanau a Sefydliadau Tebyg sy'n Gweini Bwyd
• Canllaw'r Diwydiant ar Arfer Hylendid Da: Gweithgynhyrchu Brechdanau

Busnesau manwerthu

• Canllawiau Arferion Gorau ar gyfer Cynhyrchu Bwyd Wedi'i Oeri: Rhifyn 4

Canllawiau diwydiant eraill i gynorthwyo'ch busnes 

• Canllaw Arlwyo: Canllaw i'r diwydiant ar arferion hylendid da 
• dosbarthwyr cyfanwerthu
• proseswyr pysgod gwyn
• gwerthu a dosbarthu 
• dŵr potel
• bwyd wedi'i archebu drwy'r post
• diodydd ac alcohol
• berwr y dŵr (watercress)